Inscription Water kiosk:

Gays-ı midrâr-ı kerem cedvel-i enhâr-ı himem Menbaʽ-ı cûy [u] atâ menhel-i ihsân ü safâ

Hüsrev-i dâd-meniş Hazret-i Sultân Hamîd Etdi bârân-ı adâletle cihânı irvâ

Zer ü sîmi su gibi sarf ederek kılmışdır Dest-i ihsânı bu ser-çeşme-i sâfı icrâ

Ola her katresi bir bahr-i amîk-i gufrân Sâki-i Kevser ile haşr ede ukbâda Hudâ

Jâle-i adli ile buldu tarâvet âlem Açılıp gülmededir gonca-i tabʽ-ı zuafâ

Dolanıp dergehin ol şâh-ı adâlet-câhın Yüz sürer pâyine cûlar gibi ashâb-ı safâ

İlm-i şevketi serv-i çemen-i nusret olup Aka tîginden onun su gibi hûn-ı aʽdâ

Görüp itmâmını âsâr-ı cihândârının Bendesi Hayrî-i hoş-gûy-ı sadakat-peymâ

Vasfın imlâda zebân-ı kalemi ahres iken Nâgehân yâver olup muʽciz-i ilhâm-ı Hudâ

Yazdı târîhin onun nutka getirdi Laʽli Kevserin aynı değil mi bu sebîl-i zîbâ

Inscription fountains:

Zıll-i Hudâ-yı Müsteân şâhenşeh-i kevn ü mekân Bâ-bende onun hüsrevân ihsânını eyler ümîd

Feyz-i zülâl-i meşrebi sîr-âb eder her matlabı Devrinde çarhın kevkebi her biri hurşîd-i saîd

Mir’at-ı tabʽ-ı enveri hurşid olur reşk-âveri Efʽâl-i hayrın masderi ol tabʽ-ı pür-nûr u reşîd

Rûh-ı Hüseyni şâd edip feyzinden istimdâd edip Bu çeşmeyi bünyâd edip atşânı kıldı müstefîd

Ol hüsrev-i kudsî-sıfât icrâ edip azb-i Fırât Leb-teşnesi âb-ı hayât şerminden olmuş nâ-bedîd

Atşân eder tâ cüst ü cû suyu cihânda sû-be-sû Fermânını mânend-i cû icrâ ede Rabb-i Mecîd

Lütfu kazıp mermerde nâm oldu enâm içre be-nâm Yazdı iki târîh-i tâm her biri mümtâz ü vahîd

Rûh-ı Hüseyni şâd eyle mâ’-i safâyı ver dile Zemzem akıtdı cûd ile şâh-ı cihân Abdülhamîd